നിങ്ങളുടെ വാക്കുകളുടെ അടിമയേക്കാള്‍ നിശബ്ദതയുടെ രാജാവായിരിക്കൂ…

”ജ്ഞാനിയായ മനുഷ്യന്‍ നഷ്ടങ്ങളെയോര്‍ത്ത് വിലപിച്ചിരിക്കില്ല, പക്ഷേ നഷ്ടങ്ങള്‍ പരിഹരിക്കുന്നതിനുള്ള വഴികളെക്കുറിച്ച് സന്തോഷത്തോടെ സംസാരിക്കും”- വില്യം ഷെയ്ക്‌സ്പിയർ

ലോകം കണ്ട മഹാനായ എഴുത്തുകാരന്‍ വില്യം ഷെയ്ക്‌സ്പിയറിന്റെ ചരമവാര്‍ഷിക ദിനമാണ് ഇന്ന്. ഷെയ്ക്‌സ്പിയറുടെ കൃതികളെ അവലംബമാക്കി നിരവധി മലയാള ചലച്ചിത്രങ്ങളും പിറവിയെടുത്തിട്ടുണ്ട്.

സാഹിത്യ ചരിത്രകാരന്മാര്‍ ഷെയ്ക്‌സ്പിയറുടെ രചനാകാലയളവിനെ നാലു ഘട്ടമായി വിഭജിക്കുന്നു. ആദ്യ ഘട്ടമായ 1590 ന്റെ മധ്യം വരെ അദ്ദേഹം റോമന്‍, ഇറ്റാലിയന്‍ മാതൃകകളില്‍ നിന്നും ചരിത്ര നാടകങ്ങളില്‍ നിന്നും പ്രചോദനമുള്‍ക്കൊണ്ട് പ്രധാനമായും ശുഭാന്തനാടകങ്ങളാണ് എഴുതിയത്. രണ്ടാം ഘട്ടമായ 1595 മുതല്‍ 1599 വരെയുള്ള കാലയളവ് ആരംഭിക്കുന്നതും അവസാനിക്കുന്നതും രണ്ട് ദുരന്തനാടകങ്ങളോടെയാണ്. റോമിയോ ആന്റ് ജൂലിയറ്റും ജൂലിയസ് സീസറും. അദ്ദേഹത്തിന്റെ ഏറ്റവും പ്രശസ്തമെന്ന് കണക്കാക്കുന്ന ശുഭാന്തചരിത്ര നാടകങ്ങളും രചിക്കപ്പെട്ടത് ഈ കാലഘട്ടത്തിലാണ്. 1600 മുതല്‍ 1608 വരെയുള്ള കാലയളവിലാണ് ദുരന്ത നാടകങ്ങള്‍ രചിച്ചത്. ഈ സമയത്താണദ്ദേഹം ലോകോത്തരങ്ങളായ ദുരന്ത നാടകങ്ങളായ ഹാംലറ്റ്, ഒഥല്ലോ, കിങ്ങ് ലിയര്‍, മാക് ബത്ത്, ആന്റണി ആന്റ് ക്ലിയോപാട്ര, കൊറിയോലനസ് എന്നിവ എഴുതിയത്.1608 മുതല്‍ 1613 വരെ അവസാന കാലയളവില്‍ അദ്ദേഹം ശുഭാന്ത ദുരന്ത മിശ്രിതമായ കാല്‍പ്പനികങ്ങള്‍ എന്ന് വിളിക്കുന്ന ലാജി കോമഡികള്‍ എഴുതി സിംബെലൈന്‍, 3 വിന്റേഴ്‌സ് ടെയില്‍, ദ ടെംപസ്റ്റ് എന്നിവ ഇവയില്‍ പ്രധാനമാണ്.

വില്യം ഷേക്‌സ്പിയര്‍ (1564-1616)

വിശ്വവിഖ്യാതനായ നാടകകൃത്തും കവിയും. 1564 ഏപ്രില്‍ 23-ന് ഇംഗ്ലണ്ടിലെ ആവണ്‍ നദീതീരത്തുള്ള സ്ട്രാറ്റ്ഫഡില്‍ ജനിച്ചു. കമ്പിളിക്കച്ചവടക്കാരനായിരുന്ന ജോണ്‍ ഷേക്‌സ്പിയറുടെയും മേരിയുടെയും മൂന്നാമത്തെ പുത്രനായിരുന്നു. പ്രാഥമികവിദ്യാഭ്യാസം മാത്രം നേടി ലണ്ടനിലെത്തി നാടകശാലകളില്‍ ചെറിയ ജോലികളില്‍ പ്രവേശിച്ചു. കാലക്രമേണ നടന്‍, മാനേജര്‍, നാടകകൃത്ത് എന്നീ നിലകളില്‍ പ്രശസ്തനായി. ബെന്‍ ജോണ്‍സണ്‍, ക്രിസ്റ്റഫര്‍ മാര്‍ലോ എന്നിവരുടെ സമകാലികന്‍. പതിമൂന്ന് ശുഭാന്തങ്ങളും പത്ത് ദുരന്തങ്ങളും പത്ത് ചരിത്രനാടകങ്ങളും നാല് ദുരന്തശുഭാന്തങ്ങളുമടക്കം 37 നാടകങ്ങളും 154 ഗീതകങ്ങളും വീനസും അഡോണിസും, ലുക്രീസിന്റെ ബലാത്സംഗം എന്നീ ഖണ്ഡകാവ്യങ്ങളും കുറെ ലഘുഭാവഗീതികളും രചിച്ചു. 1613 ജൂണില്‍ പുറത്തുവന്ന ഹെന്റി എട്ടാമന്‍ അവസാന നാടകമായി കണക്കാക്കുന്നു. മക്‌ബെത്, ഒഥെല്ലോ, കിങ്‌ലിയര്‍, ഹാംലെറ്റ്, ജൂലിയസ് സീസര്‍, ആന്റണിയും ക്ലിയോപാട്രയും, റോമിയോയും ജൂലിയറ്റും, ടെംപസ്റ്റ്, വെനീസിലെ വ്യാപാരി എന്നിവ രചനകളില്‍ അതിപ്രശസ്തം. 1616 ഏപ്രില്‍ 23-ന് ലണ്ടനില്‍ അന്തരിച്ചു.

വില്യം ഷെയ്ക്‌സ്പിയറിന്റെ പുസ്തകങ്ങള്‍ക്കായി ക്ലിക്ക് ചെയ്യൂ