സൈന നെഹ്‌വാളിന് ജന്മദിനാശംസകള്‍
ഇന്ത്യയിലെ പ്രശസ്ത ബാഡ്മിന്റണ്‍ താരമാണ് ഖേല്‍രത്‌ന പുരസ്‌കാരജേതാവായ സൈന നെഹ്‌വാള്‍. ഇന്ത്യയുടെ അയണ്‍ ബട്ടര്‍ഫ്‌ളൈ എന്ന് വിശേഷണമുള്ള സൈന 1990 മാര്‍ച്ച് 17-ന് ഹരിയാനയിലെ ഹിസാറിലാണ് ജനിച്ചത്. ഇന്ത്യന്‍ ബാഡ്മിൻ്റണ്‍ താരമായ പി കശ്യപാണ്
സൈനയുടെ ഭര്‍ത്താവ്. കഴിഞ്ഞ വര്‍ഷം അവസാനമായിരുന്നു ഇരുവരുടെയും വിവാഹം.
2015ൽ ലോക വനിതാ ബാഡ്മിന്റൻ റാങ്കിങ്ങിൽ ഒന്നാം സ്ഥാനത്തെത്തുന്ന ആദ്യ ഇന്ത്യക്കാരിയായിരുന്നു സൈന. നിലവിൽ ഒൻപതാം റാങ്കിലുള്ള സൈന ഒളിംപിക്സിലും കോമൺവെൽത്ത് ഗെയിംസിലും മെഡൽ നേടിയിട്ടുണ്ട്. ഇന്ത്യയിൽ കായിക രംഗത്തെ പരമോന്നത ബഹുമതിയായ രാജീവ് ഗാന്ധി ഖേൽ രത്ന പുരസ്കാരവും അർജുന അവാർഡും ലഭിച്ചിട്ടുണ്ട്. ഒളിംപിക്‌സില്‍ ബാഡ്മിന്റന്‍ സിംഗിള്‍സില്‍ ക്വാര്‍ട്ടര്‍ ഫൈനലിലും സെമിഫൈനലിലും എത്തുന്ന ആദ്യത്തെ ഇന്ത്യന്‍ താരം, വേള്‍ഡ് ജൂനിയര്‍ ബാഡ്മിന്റന്‍ ചാമ്പ്യന്‍ഷിപ്പ് നേടിയ ആദ്യത്തെ ഇന്ത്യക്കാരി എന്നീ ബഹുമതികളും സൈനയ്ക്കുണ്ട്.
ജക്കാര്‍ത്തയില്‍ വച്ചു നടന്ന ഇന്തോനേഷ്യ ഓപ്പണ്‍ മത്സരത്തില്‍ ബാഡ്മിന്റണില്‍ ഉയര്‍ന്ന സ്ഥാനക്കാരിയും, ചൈനീസുകാരിയുമായ ലിന്‍ വാംഗിനെ പരാജയപ്പെടുത്തി ചരിത്രം കുറിക്കുകയുണ്ടായി. ഈ നേട്ടം കൈവരിക്കുന്ന ആദ്യത്തെ ഇന്ത്യക്കാരിയാണ് സൈന. ഇന്ത്യയില്‍ ഏറ്റവും കൂടുതല്‍ പ്രതിഫലം പറ്റുന്ന വനിതാ കായികതാരമെന്ന ബഹുമതിയും സൈനക്കുള്ളതാണ്. സൈനയുടെ വരവ് ഇന്ത്യയില്‍ ബാഡ്മിന്റണുണ്ടാക്കിയ കുതിപ്പ് വളരെ വലുതാണ്. വനിതാ ബാഡ്മിന്റണില്‍ ചൈനയുടെ അധിനിവേശത്തെ വെല്ലുവിളിച്ച സൈന ലണ്ടനില്‍ വെങ്കലമെഡല്‍ നേടിയതോടെ ഇന്ത്യന്‍ സ്‌പോര്‍ട്‌സിലെ പുതിയ സൂപ്പര്‍താരമായി വളര്‍ന്നു. ഇതുവരെ 16 അന്താരാഷ്ട്ര കിരീടങ്ങള്‍ നേടിയിട്ടുണ്ട്.
ഈ വര്‍ഷം ജനുവരിയില്‍ സൈന ബി.ജെ.പിയില്‍ ചേര്‍ന്നു. ഡല്‍ഹി നിയമസഭാ തിരഞ്ഞെടുപ്പിനു മുന്നോടിയായി ബി.ജെ.പി ആസ്ഥാനത്തു നടന്ന ചടങ്ങിലാണ് സൈന അംഗത്വമെടുത്തത്. സൈനയുടെ മൂത്ത സഹോദരി ചന്ദ്രാന്‍ശു നെഹ്‌വാളും ഇതേ ചടങ്ങില്‍ ബിജെപി അംഗത്വമെടുത്തിരുന്നു. സൈന നെഹ്‌വാളിന്റെ ജീവിതം പ്രമേയമായി ചലചിത്രവും ഒരുങ്ങുന്നുണ്ട്. ശ്രദ്ധ കപൂര്‍ ആണ് ചിത്രത്തില്‍ സൈന നെഹ്‌വാളായി എത്തുന്നത്. അമോല്‍ ഗുപ്തയാണ് ചിത്രം സംവിധാനം ചെയ്യുന്നത്. സൈന എന്നാണ് ചിത്രത്തിന്റെ പേര്.
Comments are closed.