“മാമാ നിങ്ങളുടെ മുടിക്ക് എന്റേതിനേക്കാൾ ഉള്ളുണ്ട്, പക്ഷേ നിങ്ങളുടെ തോളിൽ ചവിട്ടി മുടിക്കു പിടിക്കാൻ ഒരു ചെറു കൈ പോലുമില്ലല്ലോ”

“മാമാ നിങ്ങളുടെ മുടിക്ക് എൻറെതിനേക്കാൾ ഉള്ളുണ്ട്.പക്ഷേ നിങ്ങളുടെ തോളിൽ ചവിട്ടി മുടിക്കു പിടിക്കാൻ ഒരു ചെറു കൈ പോലുമില്ലല്ലോ”

പെരുമാൾ മുരുകൻ മലയാളി വായന സമൂഹത്തിന് ഒരു മുഖവുരയും ആവശ്യമില്ലാത്ത എഴുത്തുകാരനാണ്. പെരുമാൾ മുരുകകന്റെ എല്ലാ രചനകളും ഒരു സമൂഹത്തിൻറെ സാമൂഹിക പ്രശ്നങ്ങളിൽ നിന്ന് പ്രചോദനമുൾക്കൊണ്ട് തൂലികയിലേക്ക് പകർന്നവയാണ്. അദ്ദേഹത്തിൻറെ ഏറ്റവും പ്രശസ്തമായ നോവലായ മാതൊരുപാകൻറെ മലയാള വിവർത്തനമാണ് അർദ്ധനാരീശ്വരൻ.

1940 കളിലെ തമിഴ്നാട്ടിലെ തിരുചെങ്കോട് എന്ന ഗ്രാമമാണ് ഈ നോവലിന്റെ പ്രതലം. വിവാഹം കഴിഞ്ഞ് 12 വർഷമായിട്ടും കാളി – പൊന്ന ദമ്പതികൾക്ക് ഒരു കുഞ്ഞുണ്ടായില്ല.കുടുംബത്തിൽ നിന്നും സമൂഹത്തിൽ നിന്നും നിരന്തരമായ പരിഹാസത്തിന്റെ ഉറവിടമായി അത് മാറുന്നു. ദൈവ കോപവും പൂർവികരുടെ മോശം പെരുമാറ്റവും ഇതിനു കാരണമായി പറയുകയും നിരാശരായ ദമ്പതികൾ പലവിധ പ്രാർത്ഥനകളും പരിഹാരങ്ങളും വഴിപാടുകളും പരീക്ഷിക്കുകയും ചെയ്യുന്നു. അവസാന ആശ്രയം എന്ന നിലയിൽ അർദ്ധനാരീശ്വര രഥോത്സവത്തിന് പൊന്ന പോകണമെന്ന് കുടുംബം നിർദ്ദേശിച്ചു. അവിടെ പതിനാലാം ദിവസം വിവാഹേതര ലൈംഗികബന്ധത്തിലൂടെ ഒരു കുഞ്ഞിനെ ലഭിക്കാൻ അവരുടെ കുടുംബം പൊന്നയെ നിർബന്ധിക്കുകയും ഇത് കാളിയുടെയും പൊന്നയുടെയും കുടുംബ ബന്ധത്തിൻറെ തകർച്ചയിലേക്ക് നയിക്കുകയും ചെയ്യുന്നു. ഇതാണ് ഈ നോവലിൻറെ സാരാംശം.

പക്ഷെ ഇതിനപ്പുറത്തോട്ട് ഈ നോവലിന് പല പ്രത്യേകതകളുമുണ്ട് . അതോടൊപ്പം തന്നെ ഈ നോവൽ ചർച്ച ചെയ്യുന്ന പല സാമൂഹിക ഘടകങ്ങളുമുണ്ട്.

വളരെ മികവുറ്റ കഥാപാത്ര നിർമ്മിതിയാണ് നോവലിലേത്.എല്ലാ കഥാപാത്രങ്ങൾക്കും അവരുടേതായ കുറവുകളും ശക്തമായ വശങ്ങളും ഉണ്ട്.കേന്ദ്ര കഥാപാതങ്ങളായ പൊന്നയും കാളിയും പല സമയത്തും അവരുടെ പെരുമാറ്റത്തിൽ ധീരത പ്രതിഫലിപ്പിക്കുന്ന കഥാപാത്രങ്ങളാണ് എങ്കിലും വൈരുധ്യ സ്വഭാവങ്ങളുള്ളവരാണ്.പൊന്നയെ സ്വാതന്ത്ര്യത്തോടെ ചിത്രീകരിച്ചിരിക്കുന്നു,അവളുടെ ശരീരത്തിന്റെ അവകാശം അവൾ തന്നെയാണ് തീരുമാനിച്ചിരുന്നത്. പോരാടാനുള്ള സ്വാതന്ത്ര്യവും ആത്മാഭിമാനവും വ്യക്തിത്വവും പൊന്ന പ്രകടമാക്കുന്നുണ്ട് , എന്നിട്ടും അവരുടെ വിധിക്ക് അതിൽ നിന്ന് രക്ഷപ്പെടാൻ കഴിഞ്ഞില്ല.

വിശ്വസ്തനായ ഭർത്താവാണ് കാളി.ജീവിതത്തെക്കുറിച്ചുള്ള നിഷേധാത്മക അഭിപ്രായങ്ങൾ ശക്തമായി പ്രകടിപ്പിക്കുകയും അഭിമുഖീകരിക്കുകയും ചെയ്തിരുന്ന കാളി പക്ഷെ തന്റെ ശാപങ്ങളെ ദേവന്മാരിൽ നിന്ന് നീക്കം ചെയ്യുന്നതിനുള്ള എല്ലാ സാമൂഹികവും മതപരവുമായ ആചാരങ്ങളെയും അന്ധമായി അനുസരിക്കുന്നു.

ദമ്പതികൾ പരസ്പരം സന്തോഷത്തിലായിരുന്നു, പന്ത്രണ്ടു വർഷമായി പരസ്പരം ഭ്രാന്തമായി പ്രണയത്തിലാവുകയും, ലൈംഗിക ബന്ധത്തിൽ ഏർപ്പെടുകയും ചെയ്യുന്നു..അനുസരണയുള്ള, വിധേയയായ, തമിഴ് പുരുഷ ഭാവനയിൽ മാത്രം നിലനിൽക്കുന്ന തരത്തിലുള്ള ഒരു ഭാര്യയാണ് പൊന്ന. കാളി അവളോട് അങ്ങേയറ്റം വാത്സല്യത്തോടെ പെരുമാറുന്നു, കൂടാതെ അവളോട് അടങ്ങാത്ത ആസക്തിയുമുണ്ട് .കാളിയും പൊന്നയും തമ്മിലുള്ള അതിശയകരമായ സ്നേഹം വളരെ സ്വാഭാവികമാണ്.അവരുടെ ചെറിയ അടുപ്പങ്ങൾ പോലും വലിയ അഭിരുചികളോടെയാണ് നോവലിസ്റ്റ് എഴുതുന്നത്. അവർ ഒരുമിച്ച് സന്തുഷ്ടരാണ്.ഒരു കുട്ടിയെ ഗർഭം ധരിക്കാനായില്ല എന്നതാണ് അവരുടെ ജീവിതത്തിലെ കറുത്ത അടയാളം. സാധ്യമായ എല്ലാ സന്ദർഭങ്ങളിലും, രചയിതാവ് ഇരുവരും പങ്കിടുന്ന സ്നേഹം കാണിക്കുന്നു.

മക്കളില്ലാത്ത ദമ്പതികളുടെ കാര്യം വരുമ്പോൾ സമൂഹം എത്ര ക്രൂരമായിരിക്കുമെന്ന് ഈ പുസ്തകം പറയുന്നു.കുട്ടികളില്ലാത്ത ദമ്പതികളോട് സമൂഹം ഇന്നും പെരുമാറുന്നത് (ഗ്രാമങ്ങളിലെങ്കിലും) ഇങ്ങനെ തന്നെയാവും. ഇതാണ് ഈ പുസ്തകത്തിന്റെ കാലാതീതമായ പ്രസക്തി.”ആ വന്ധ്യയായ സ്ത്രീ വിത്തുകൾ ചുമന്ന് മുകളിലേക്കും താഴേക്കും ഓടുന്നു.അവൾ സ്പർശിച്ചു കഴിഞ്ഞ വിത്തുകൾ വളരുമെന്ന് നിങ്ങൾ പ്രതീക്ഷിക്കുന്നുണ്ടോ?”.

ഇന്ത്യയിൽ പ്രതേകിച്ചും ഇന്ത്യൻ ഗ്രാമീണ മണ്ഡലത്തിൽ വിവാഹം എന്ന പ്രസ്ഥാനത്തിൽ പുരുഷൻ എപ്പോഴും ഒരു വിവേചനാധികാരം അല്ലെങ്കിൽ സ്ത്രീയേക്കാൾ കൂടുതൽ വിശാലമായ ഒരു ഇടം അനുഭവിക്കുന്നു. സ്ത്രീ നിരന്തരം നിർബന്ധിക്കപ്പെടുകയും അവൾ സന്തതികളെ പ്രസവിക്കുന്നതിനുള്ള ഒരു ഉപകരണമായും മാത്രം പരിഗണിക്കപ്പെടുന്നു. കാളിയെ മറ്റൊരു വിവാഹത്തിന് നിർബന്ധിക്കുന്നതിലൂടെ കുട്ടികൾ ഉണ്ടാകാത്തതിന്റെ എൻറെ എല്ലാ പഴിയും പൊന്നയുടെ മേൽ കെട്ടിവച്ച് അവളെ സമ്മർദ്ദത്തിൽ ആക്കാനാണ് കുടുംബവും ശ്രമിക്കുന്നത്.

ജാതീയതയും അന്ധവിശ്വാസങ്ങളും അനാചാരങ്ങളും എത്രത്തോളം ആഴത്തിൽ ഒരു ഗ്രാമീണ സംസ്കാരത്തിൽ വേരോടിയിട്ടുണ്ടാകും എന്ന് നമുക്ക് മുന്നിൽ അനാവരണം ചെയ്യുന്നുണ്ട് നോവലിസ്റ് .
കാളിക്കും – പൊന്നക്കും കുട്ടികളുണ്ടാകാത്തതിന്റെ കാരണമായി കുടുംബ ശാപങ്ങൾ, ദൈവക്രോധം അല്ലെങ്കിൽ അവരുടെ പൂർവ്വികരുടെ മോശം പെരുമാറ്റം എന്നിവ കാരണമായി പറയുന്നു. നിരാശരായ ദമ്പതികൾ അവർക്ക് കഴിയുന്ന എല്ലാ പ്രവൃത്തികളും ചെയ്യുന്നു, എല്ലാ അന്ധവിശ്വാസങ്ങളും അനുസരിക്കുന്നു. വിവിധ ക്ഷേത്രങ്ങളിൽ വഴിപാടുകൾ നടത്തുന്നു, മരിച്ച പൂർവികരുടെ മുൻകാല തെറ്റുകൾക്ക് പ്രായശ്ചിത്തം ചെയ്യുന്നു, ഒന്നും ഫലമുളവാക്കിയില്ല.

സ്വാതന്ത്ര്യത്തിനു മുമ്പുള്ള ഗ്രാമീണ ഇന്ത്യയിലെ ജീവിതത്തെയും ഇത് ചിത്രീകരിക്കുന്നു, പ്രത്യേകിച്ചും ജാതിവ്യവസ്ഥ നിശ്ചയിച്ചിട്ടുള്ള കർശനമായ സാമൂഹിക ശ്രേണിയെ. തന്റെ ഭർത്താവിന്റെ സാമൂഹിക നില മെച്ചപ്പെടുത്തുന്നതിനും, കുടുംബത്തിന്റെ സ്വത്തിന് അവകാശിയുടെ അഭാവത്തിൽ മറ്റുള്ളവർ അവകാശമുന്നയിക്കുന്നത് തടയാനും ഗർഭം ധരിക്കാൻ കുടുമ്പവും സമൂഹവും പൊന്നയെ സമ്മർദ്ദത്തിലാക്കുന്നു.അതിനാൽ, ദമ്പതികളുടെ ദുരിതങ്ങളിൽ വലിയൊരു ഭാഗം വരുന്നത് ഒരു കുട്ടിയുണ്ടാകാനുള്ള അവരുടെ ആഗ്രഹത്തിൽ നിന്നല്ല, മറിച്ച്സമൂഹത്തിന്റെ ഒറ്റപ്പെടുത്തലുകളിൽ നിന്നാണ്.സമൂഹത്തിന്റെ ഈ സംഘടിത ആക്രമണ ആസക്തി എങ്ങിനെ സ്നേഹമുള്ള ദമ്പതികളെ വേർപെടുത്തി അവരുടെ സന്തുഷ്ട ദാമ്പത്യത്തെ ഇല്ലാതാക്കിയെന്ന് നോവൽ പരിശോധിക്കുന്നു.

ഇന്ത്യയിലെ പുരുഷാധിപത്യം എങ്ങിനെ ആചാരങ്ങളുടെ പേരിൽ സ്ത്രീകളെ ലിംഗപരമായ ചൂഷണങ്ങൾക്ക് ഇരകളാക്കുന്നു എന്നും നോവൽ പരിശോധിക്കുന്നു. അർദ്ധനാരീശ്വരന്റെ രഥോത്സവത്തിന് പൊന്ന പോകണമെന്ന നിർദ്ദേശം അവരുടെ കുടുംബങ്ങൾ മുന്നോട്ടുവച്ചു, അവിടെ 14-ാം ദിവസം, വിവാഹേതര ലൈംഗിക ബന്ധവുമായി ബന്ധപ്പെട്ട സാമൂഹിക വിലക്ക് ഇല്ലാതെയാവുകയും അവിവാഹിതരായ പുരുഷന്മാരും സ്ത്രീകളും തമ്മിലുള്ള സമ്മതത്തോടെയുള്ള ലൈംഗികബന്ധം അനുവദിക്കുകയും ചെയ്യും , കാരണം എല്ലാ പുരുഷന്മാരും അന്ന് ദേവന്മാരായി കണക്കാക്കപ്പെടുന്നു.

അപൂർവമായി മാത്രം കാണപ്പെടുന്ന മികച്ച രചനാശൈലി,കഥാപാത്രങ്ങളും സംഭവങ്ങളും വായന പൂർത്തിയാക്കിയതിനുശേഷവും വായനക്കാരനിൽ അവശേഷിക്കുക, പ്രാദേശിക തമിഴ് സംസ്കാരത്തെക്കുറിച്ചും ജനങ്ങളുടെ മാനസികാവസ്ഥയെക്കുറിച്ചും ഉള്ള സൂക്ഷ്മമായ സംഗ്രഹം, തമിഴ് ഗ്രാമീണ ജീവിതത്തെയും അവരുടെ വിശ്വാസങ്ങൾ, ആചാരങ്ങൾ, പാരമ്പര്യങ്ങൾ, ജീവിതരീതി തുടങ്ങിയവയെയും കുറിച്ചുള്ള വ്യക്തമായി ചിത്രീകരണം ഇവയെല്ലാം ഈ വായനയെ വ്യത്യസ്തമാക്കുന്നു.

പുസ്തകം വാങ്ങാൻ സന്ദർശിക്കുക

പുസ്തകം ഡൗൺലോഡ് ചെയ്യുന്നതിനായി ഇവിടെ ക്ലിക്ക് ചെയ്യുക

പെരുമാള്‍ മുരുകന്റെ ‘അര്‍ദ്ധനാരീശ്വരന്‍’ എന്ന നോവലിന് അലി മുഹമ്മദ് എഴുതിയ വായനാനുഭവം

Ali Muhammad