‘നീതി’ ; പി.കെ. പാറക്കടവ് എഴുതിയ കഥ
ഡി സി ബുക്സ് പ്രസിദ്ധീകരിച്ച പി.കെ. പാറക്കടവിന്റെ ‘തിരഞ്ഞെടുത്ത കഥകൾ’ എന്ന സമാഹാരത്തിൽ നിന്നും ഒരു കഥ, ‘നീതി’
ആദ്യം കുഞ്ഞിന്റെ ചോറ്റുപാത്രം ഞങ്ങളെടുത്തു. സോമാലിയയില്‍ പട്ടിണിയാണ്.
ഭക്ഷണം കഴിക്കാതെ ജീവിക്കാന്‍ ഇപ്പോഴേ പഠിക്കേണ്ടേ?
പിന്നീട് കുഞ്ഞിന്റെ കളിപ്പാട്ടങ്ങള്‍ ഞങ്ങള്‍ കവര്‍ന്നു.
വളരുമ്പോള്‍ ഈ കളിപ്പാട്ടങ്ങള്‍ അവര്‍ ആയുധമാക്കുമെന്ന് മന:ശാസ്ത്രജ്ഞര്‍.
അവസാനം അവന്റെ അമ്മയേയും അച്ഛനെയും ഞങ്ങള്‍ കൊന്നു.
സ്വന്തം കാലില്‍ നില്‍ക്കാന്‍ അവന്‍ പഠിക്കേണ്ടേ?
എന്നിട്ട് അവന്‍ വാവിട്ട് നിലവിളിച്ചപ്പോള്‍ ഞങ്ങളുടെ ഉറക്കം കളഞ്ഞതിന് അവനെതിരെ ഞങ്ങള്‍ കേസെടുത്തു.
Comments are closed.