ഈ രാത്രി ഉറക്കം വന്നില്ല, തിലകന്റെ ഓർമ്മകൾ ആർത്ത് പെയ്ത് കൊണ്ടേയിരുന്നു!

ഈ രാത്രി ഉറക്കം വന്നില്ല. തിലകന്റെ ഓർമ്മകൾ ആർത്ത് പെയ്ത് കൊണ്ടേയിരുന്നു. പെരുമഴയേക്കാൾ പെരുമഴ, ഓർമ്മയുടെ മൌനമഴ. ഇരമ്പത്തേക്കാൾ ഇരമ്പുന്ന മൌനം. മച്ചിലും മുറ്റത്തും ചുറ്റിലും ദൂരത്തെ വയലുകളിലും പല പല സായാഹ്നയാത്രകളിലും ആ വലിയ നന്മയുടെ കുളിര് വളരുന്നു. മുംബൈയിലെ കടലോരത്തും മലബാർ ഹില്ലിലും എലിഫന്റാഗുഹകളിലും സ്ട്രാൻഡ് ബുക്സ്റ്റാളിലും ചെമ്പൂരെ ആദർശവിദ്യാലയത്തിലും സാന്താക്രൂസിലും അണുശക്തിനഗറിലും ഗാട്‌കോപ്പറിലെ ഉദ്യാനങ്ങളിലും ഡോംബിവ്ലിയിലും പല സദസ്സുകളിലും ഔറംഗബാദിലും അജന്തയിലും എല്ലോറയിലും കൊച്ചിയിലും തൃശൂരിലും ബാംഗ്ലൂരിലും കവിതയും രാഷ്ട്രീയവും ചിന്തയും ഫലിതവും രുചികളും ക്ഷോഭവും കലാപവും വഴി അനേകം ചരിത്രദേശങ്ങളിലും ഓർമ്മകൾ ഇരമ്പി വീഴുന്നു. നേരം പുലർന്നു.

കാക്കകൾ നനഞ്ഞിറങ്ങി. അവയുടെ ഒച്ചവെപ്പിൽ പതിവില്ലാതെന്തെങ്കിലുമുണ്ടോ?