മധു മാഷ്; യൂദാസിന്റെ സുവിശേഷം’ ഉള്ളിടത്തോളം എന്നെ വിട്ടുപോകാത്ത ഒരാൾ

“… ഒരു രാത്രിയിലാണ് എന്നെ അവർ അറസ്റ്റ് ചെയ്തത്. ക്യാപ്റ്റൻ അറസ്റ്റിലാകുന്നതിനു തൊട്ടുമുമ്പ്. അമ്മയ്ക്ക് അന്നു ദീനം കലശലായിരുന്നു. രാത്രി മഫ്തിയിൽ ഒരാൾ വീട്ടിൽ വന്നു. സേതുമാഷില്ലേ എന്നു വിനയത്തോടെ ചോദിച്ചു. ഒരു ചെറിയ പ്രശ്നണ്ടു മാഷേ, പരമീശരൻ സാറിന് എന്തോ ചോയ്ച്ചു മനസ്സിലാക്കാൻണ്ട്. എനിക്കു കാര്യം മനസ്സിലായി. ഞാൻ അമ്മയ്ക്ക് ഇത്തിരി വെള്ളം കൊടുത്തോട്ടെ എന്നു ചോയ്ച്ചു.ഗംഗാജലണ്ടായിരുന്നു വീട്ടിൽ. ഒരു ചെറിയ സ്പൂണിൽ ഞാൻ രണ്ടു തുള്ളി അമ്മയ്ക്കു കൊടുത്തു. ഇനി കാണലുണ്ടാവില്ല അമ്മേ എന്നു പറഞ്ഞു നെറ്റിയിൽ ഒരുമ്മ കൊടുത്തു. എനിക്ക് അറിയാമായിരുന്നു കൊണ്ടോയാൽ പിന്നെ കാണലുണ്ടാവില്ല. വിടുംന്ന് എന്താ ഉറപ്പ്? വിട്ടാൽത്തന്നെ അതെന്നാണെന്ന് എന്താ ഉറപ്പ് ? ഞാനുടനെ ചെന്നു വണ്ടിയിൽ കയറി. ആദ്യം എസ്.പി. ഓഫിസിൽ കൊണ്ടന്നു. അവിടെ ചോദ്യം ചെയ്തു. പിന്നെ രാത്രിയായപ്പോൾ കണ്ണുകെട്ടി ഒരു കാറിൽ കയറ്റി, ഈ വഴിയിലെ വളവും തിരിവും കുണ്ടും കുഴിയും ഒക്കെ ഞാനോർക്ക്ണ്ട്… ” മാഷ് പിന്നിലേക്കു ചാരി ഒന്നു നെടുവീർപ്പിട്ടു. വീണ്ടും ചിരിച്ചു. “കണ്ണു കെട്ടി ഒരു വണ്ടിയിൽ ഇരിക്കുന്നത് ഒരു വല്ലാത്ത അനുഭവാടോ. അനുഭവിച്ചന്നെ അറിയണം. ”