കവി ബിനു എം പള്ളിപ്പാട് അന്തരിച്ചു

കവിയും പുല്ലാങ്കുഴൽ വാദകനുമായിരുന്ന ബിനു.എം.പള്ളിപ്പാട് അന്തരിച്ചു. 47 വയസ്സായിരുന്നു.  എഴുത്ത് ആത്മാവില്‍ സത്യത്തിന്റെ പച്ചകുത്ത ലാണ് എന്ന് ബോദ്ധ്യപ്പെടുത്തുന്ന കവിതകളായിരുന്നു ബിനു എം പള്ളിപ്പാടിന്റേത്. ദുരിതകാലത്തെ റേഷന്‍കഞ്ഞിയും കൊയ്യാലുപാത്രവും കൊയ്ത്തരിവാളും സംഗീതത്തിന്റെ ഇടിമുഴക്കങ്ങളും ആ കവിതകളില്‍ നിറഞ്ഞു നിന്നു. ബിനുവിന് കവിത ജീവിതത്തിന്റെ ഉപ്പും ചോരയുമായിരുന്നു. അദ്ദേഹത്തിന്റെ ‘അവര്‍ കുഞ്ഞിനെ തൊടുമ്പോള്‍’ എന്ന പുസ്തകം ഡി സി ബുക്‌സ് പ്രസിദ്ധീകരിച്ചിട്ടുണ്ട്.

ആലപ്പുഴ ജില്ലയിൽ ഹരിപ്പാടിനടുത്തുള്ള പള്ളിപ്പാട് ഗ്രാമത്തിൽ 1974 ൽ ജനനം. നടുവട്ടം ഹൈസ്കൂളിലും ദേവസ്വം ബോർഡ് പമ്പ കോളേജിലുമായി വിദ്യാഭ്യാസം. 1991 മുതൽ ആനുകാലികങ്ങളിൽ എഴുതുന്നു. ആനുകാലികങ്ങളിൽ പ്രസിദ്ധീകരിക്കുന്ന കവിതകളിൽ നിന്നു തിരഞ്ഞെടുക്കുന്ന മികച്ച ഒറ്റക്കവിതയ്ക്കുള്ള മതിലകം കനിവ് 2022 പുരസ്കാരം ബിനുവിൻ്റെ ‘പാലുവം പെണ്ണ്’ എന്ന കവിതയ്ക്ക് ഈയിടെ ലഭിച്ചിരുന്നു.