സ്വാതന്ത്ര്യത്തിന്റെ സർഗോന്മാദം; ഡോ : ശ്രീകല മുല്ലശ്ശേരി എഴുതുന്നു

അടിമകളെ ഉല്പാദിപ്പിക്കുന്ന ഹാച്ചറിയാണ് ഇന്നത്തെ സാമൂഹിക അവസ്ഥയിൽ ഓരോ വിദ്യാഭ്യാസ സ്ഥാപനങ്ങൾ. ഗുരുകുല സംസ്കാരം കൊണ്ട് വന്ന ജ്ഞാനവ്യവസ്ഥ പൂർണമായും അധികാരപ്രയോഗത്തിന്റെതായ ഇടങ്ങൾ മാത്രമാണ് സൃഷ്ട്ടിച്ചത് എന്നും ഓരോ ഉദാഹരണങ്ങളും പഠനങ്ങളും ചൂണ്ടി കാണിച്ചുകൊണ്ട് അദ്ദേഹം പറയുന്നുണ്ട്. എത്ര സ്വാതന്ത്ര്യബോധമുള്ള മനുഷ്യരും അടിമ ഉടമ വ്യവസ്ഥയിലേക്ക് എത്തിപെട്ടാൽ അധികാരത്തിന്റെ സ്വാദ് അനുഭവിച്ചാൽ ക്രൂരമായ പീഡകരാകും. അടിമകൾ ആണെങ്കിൽ തങ്ങളുടെ ചങ്ങലകളെ ഒന്നു കൂടെ ഉറപ്പിച്ചു ആ സാഹചര്യത്തിലേക്ക് പൂർണമായും പൊരുത്തപ്പെടുകയും ചെയ്യും. സമ്പൂർണ സുരക്ഷിതത്വം തരുന്ന സേഫ് ആയ ഒരു നിലപാടായി അതിനേ കാണുകയും ചെയ്യുന്നു .

മനുഷ്യരിലെ അടിമ ഭാവത്തിനെ കുറിച്ച് മഹാത്മാ ഗാന്ധി ഇങ്ങിനെ പറഞ്ഞിരുന്നു “ഏത് നിമിഷമാണോ താൻ അടിമയല്ല എന്ന് തിരിച്ചറിയുന്നത് ആ നിമിഷം അവനെ ബന്ധിപ്പിച്ച ചങ്ങലകൾ ഓരോന്നായി ഉതിർന്നു വീഴുന്നു. സ്വാതന്ത്ര്യവും അടിമത്തവും ഒരു മാനസികാവസ്ഥയാണ് ” യഥാർത്ഥത്തിൽ ചങ്ങലകളെ പൊട്ടിച്ചെറിയുന്നവന് മാത്രമെ സർഗാത്മകതയുടെ ഉന്മാദം അനുഭവിക്കാൻ കഴിയുള്ളു എന്നുള്ളത് ഒരു നഗ്നമായ സത്യമാണ് സർഗോന്മാദം അനാവരണം ചെയ്യുന്നത്‌ .

മനുഷ്യന് മുന്നിൽ നീണ്ടു കിടക്കുന്ന അറിവിനെ പോലും വ്യക്തമായും കൃത്യമായും തരം തിരിച്ചിട്ടുണ്ട് . ഏറ്റവും പ്രാധാന്യമുള്ളത് എന്ന് പൊതുവായി കരുതപ്പെടുന്ന സയൻസിനെ മുകളിലും കലാപരമായ അറിവുകളെ ഏറ്റവും താഴെ നിലയിലുമാണ് ഉറപ്പിച്ചുവെച്ചത് . തലമുറകളായി അറിവിനെ പോലും വരുതിയിലാക്കാൻ അറിവിന് തടവറകൾ സൃഷ്ട്ടിച്ചിട്ടും അത് പൊട്ടിച്ചു പുറത്തുകടക്കാൻ അവനിലെ സർഗാത്മതക്ക് മാത്രമെ കഴിയുള്ളൂ എന്ന് ഉറക്കെ പ്രഖ്യാപിക്കുന്നുണ്ട് ജീവൻ ജോബ് തോമസ്‌ ഈ പുസ്തകത്തിലൂടെ .അതിന് വളരെ രസകരമായ ഒരു ഉദാഹരണം എന്ന നിലയിൽ ജെയിംസ് കാമറൂൺ എന്ന പ്രസിദ്ധനായ ഹോളിവുഡ് സംവിധായകൻ ഭൂമിയിലെ ഏറ്റവും ആഴമുള്ള ഭാഗമായ പസഫിക്ക് സമുദ്രത്തിലെ മരിയാന ട്രഞ്ചിലേക്ക് അന്തർവാഹിനിയിലൂടെ നടത്തിയ യാത്രയിൽ അറിവിനെ സ്പെഷ്യലൈസേഷൻ ആക്കി മാറ്റിയ വ്യവസ്ഥിതിയെ പൂർണമായി തകർത്തുകൊണ്ട് അറിവിന്റെയും അനുഭവത്തിന്റെയും ഭാവനയുടെ ലോകത്തിനേയും ആത്യന്തികമായി അനുഭവത്തിലൂടെ അദ്ദേഹം രൂപപ്പെടുത്തുകയായിരുന്നു എന്ന് പറയുന്നുണ്ട് .

കാമറൂൺ അവതാറിന്റെ തിരക്കഥക്ക് അനുസരിച്ചു സാങ്കേതിക വിദ്യ വളർന്നില്ല എന്ന് തിരിച്ചറിഞ്ഞു അതിനനുസരിച്ചു ചിത്രീകരിക്കാനുള്ള ഫ്യൂഷ്യൻ ക്യാമറ സിസ്റ്റം വികസിപ്പിച്ചെടുത്തത് കലാകാരന് ഒരു ശാസ്ത്രജ്ഞനുമാകാം എന്നുള്ള സത്യത്തിന്റെ തിരിച്ചറിയലും കൂടിയാണ് .അറിവിനെ അതിർത്തിതിരിച്ചു വേർതിരിച്ചുവെച്ച ബോധത്തിനുള്ള പ്രഹരമായി തന്നെ ജീവൻ അതിനേ സൂചിപ്പിക്കുന്നുണ്ട് .

മനുഷ്യന്റെ ആന്തരികമായ ചോദനയാണ് ജിജ്ഞാസ .ജിജ്ഞാസ കൊണ്ട് മാത്രം ഒരു ജീവിതത്തെ ജീവിച്ചു തീർത്ത ഏറ്റവും വലിയ പ്രതിഭാശാലിയായ ലിയനാർഡോ ഡാവിഞ്ചി കാഴ്ചവെച്ച സർഗാത്മക ജീവിതത്തെക്കുറിച്ചും ഒരു നോവൽ വായിക്കുന്ന അനുഭവലോകത്തിലൂടെ വായനക്കാരനെ കൊണ്ട് പോകുന്നുണ്ട് .

അതിരില്ലാത്ത മനുഷ്യസങ്കൽപ്പങ്ങളെ കുറിച്ചു പറഞ്ഞപ്പോൾ ഒരു പാഠഭാഗത്തിൽ സൂചിപ്പിച്ചപ്പോൾ ലോക ക്ലാസ്സിക്കുകളായ രാമായണവും ഇലിയഡും ഒഡീസിയും ആശയപരമായുള്ള സാമ്യത എക്കാലത്തെയും അത്ഭുതമാണ് എന്നുള്ള ചിന്തയിലേക്ക് എത്തിച്ചത്. വ്യത്യസ്‌ത കാലഘട്ടത്തിൽ വ്യത്യസ്‌ത രാജ്യങ്ങളിൽ നിന്നും വന്ന ക്ലാസ്സിക്ക് രചനകൾ തമ്മിലുള്ള സാമ്യത മനുഷ്യമനസ്സിലെ ആദിരൂപങ്ങളിലേക്കുള്ള പ്രയാണമാണ് . പ്രസിദ്ധനായ സൈക്കോ അനലിസ്റ്റ് യൂങിന്റെ ആർക്കിടൈപ്പൽ ക്രിട്ടിസിസം മനുഷ്യ സങ്കല്പങ്ങളിലെ സാമ്യതയെ വിശദീകരിക്കുന്നുണ്ട് .അതുകൊണ്ടാണ് “Archetypes are among the inalienable assets of every psyche ” എന്ന് പറയുന്നത് .

എഴുത്തിനെയും എഴുത്തുകാരനെയും വേർതിരിച്ചു കാണാൻ കഴിയില്ല കാരണം എഴുത്തുകാരന്റെ മനസ്സിന് നേരേ പിടിക്കുന്ന കണ്ണാടിയാണ് എഴുത്തു എന്നാണ് ഇത്രയും കാലം സമൂഹം ധരിച്ചു വെച്ചത് .പക്ഷെ ഓരോ എഴുത്തുകാരന്റെയും എഴുത്തു വായനക്കാരന്റെ നിലപാടുകളും ആവശ്യങ്ങളും നിയന്ത്രിച്ചുകൊണ്ടിരിക്കുമെന്നുള്ള സത്യത്തെ ഈ പുസ്‌തകം അടിവരയിടുന്നുണ്ട് . യഥാർത്ഥത്തിൽ poets are liers എന്ന് പറഞ്ഞ പ്ലേറ്റോയെയാണ് ഈ സാഹചര്യത്തിൽ ഓർത്തെടുത്തത് .

എനിക്ക് ഓർമ്മയുണ്ട് ടീവിയിലും പത്രങ്ങളിലും ഐസ്‌ക്രീം പാർലർ കേസും സൂര്യനെല്ലി കേസും , കൂടത്തായി കൊലപാതക പരമ്പരയെ കുറിച്ചുമുള്ള വാർത്തകൾ ഒരു ത്രില്ലർ മൂവി കാണുന്ന മനോഭാവത്തിലാണ് ആൾകൂട്ടം കണ്ട് കൊണ്ടിരുന്നത് . എന്തുകൊണ്ടാണ് ആൾക്കൂട്ടങ്ങൾ ഇത്ര സെൻസിറ്റീവ് ആയി റെസ്പോണ്ട് ചെയ്യുന്നത് എന്ന് എപ്പോഴും ആലോചിക്കാറുണ്ട് .അതിനെക്കുറിച്ചുള്ള ആലോചനയാണ് “കഥയും വിനോദവും “എന്ന ഭാഗത്തിൽ ജീവൻ ജോബ് തോമസ്‌ പരാമർശിക്കുന്നത് .നമ്മൾ കാണുന്നതും കേൾക്കുന്നതും അനുഭവിക്കുന്നതുമായ ഓരോ കഥയിലും വാർത്തയിലും ആസ്വാദനത്തിന്റെ തലത്തിലേക്ക് എത്തുന്നതിനെകുറിച്ചുള്ള ചർച്ചയാണ് .മാധ്യമങ്ങൾ ആഘോഷിക്കുന്ന ഓരോ വാർത്തയും കാഴ്ചക്കാരിലും കേൾവിക്കാരിലും ഉണ്ടാക്കുന്ന വിനോദത്തിന്റെ എലെമെന്റുകൾ പ്രവർത്തിക്കുന്നത് എങ്ങിനെയാണ് എന്ന് ശാസ്ത്രീയതയുടെ ബലത്തിൽ ജീവൻ വെളിപ്പെടുത്തുന്നുണ്ട് .പിന്നീട്‌ മനുഷ്യ ജീവിതത്തിലെ ഏറ്റവും തീവ്രമായ വികാരമായ പ്രതികാരത്തിനെ കുറിച്ചും ഓർമ്മകളെ കുറിച്ചും അതുണ്ടാക്കുന്ന ആഴമുള്ള മുറിവുകളെക്കുറിച്ചും സാഹിത്യത്തിൽ നിന്നും ജീവിതത്തിൽ നിന്നും ഓരോ ഏടുകൾ എടുത്തുകാണിച്ചുള്ള വിവരണമാണ് . ഇതിനെല്ലാമുപരി ഒരു നോവൽ വായനയിൽ നിന്നും വായനക്കാരന് കിട്ടുന്ന അനുഭൂതി എന്താണോ അത് തരാൻ ജീവൻ ജോബ് തോമസിന്റെ നോൺഫിക്ഷൻ രചനക്ക് കഴിഞ്ഞിട്ടുണ്ട് .അങ്ങിനെയാണ് സംഭവങ്ങളുടെയും അനുഭവങ്ങളുടെയും പഠനങ്ങളുടെയും വിവരണങ്ങൾ ഈ പുസ്തകത്തിൽ സജ്ജീകരിച്ചത് . അതൊക്കെയും ഒരു നോവലിസ്റ്റും കൂടിയായ എഴുത്തുകാരന്റെ ഭാവനാത്മകമായ ലോകം മാത്രമല്ല ശാസ്ത്രീയമായ സത്യങ്ങളും കൂടിയാണ്‌ ആത്യന്തികമായി സർഗാത്മകത മനുഷ്യജീവിതത്തിനെ സ്വാതന്ത്ര്യത്തിന്റെ അനന്തമായ സാധ്യതയിലേക്കാണ് നയിക്കുന്നത് എന്നും അത് സാധ്യമാവണമെങ്കിൽ അടിമത്തമെന്ന മാനസിക ശാരീരിക അവസ്ഥയെ സ്വയം ചെറുത്തു തോൽപ്പിക്കണമെന്നും സർഗോന്മാദത്തിലൂടെ വായനക്കാരനെ ഉത്ബോധിപ്പിക്കുന്നുണ്ട് ജീവൻ ജോബ് തോമസ് .